ಕಲರವ

ನಾನ್ರಿ ಎಡಿಟರ್: ಎಕ್ಸ್ ಜನರೇಶನ್ ಹಾಗೂ ಕೋಮುವಾದ

Posted on: ಜುಲೈ 22, 2008

ನಾನು ಹಾಗೂ ನನ್ನಂಥ ಕಾಲೇಜು ಹುಡುಗರು ಒಂದು ಅಪವಾದವನ್ನು ಎದುರಿಸುತ್ತಿದ್ದೇವೆ. ಇಂಜಿನಿಯರಿಂಗ್, ಮೆಡಿಸಿನ್, ಲಾ, ಎಂಬಿಎ ಹೀಗೆ ಏನಾದರೊಂದು ವೃತ್ತಿಪರ ಕೋರ್ಸುಗಳನ್ನು ಆಯ್ದುಕೊಂಡು ಓದಿನಲ್ಲಿ ತೊಡಗಿದವರಿಗೆ ಸ್ವಚಿಂತನೆ ಹಾಗೂ ಸ್ವಾರ್ಥವೇ ಹೆಚ್ಚು. ಸುತ್ತಮುತ್ತಲ ಸಮಾಜದ ಬಗ್ಗೆ, ಅದರ ರೀತಿ ನೀತಿಗಳ ಬಗ್ಗೆ ಅಸಡ್ಡೆ ಮೂಡಿರುತ್ತದೆ. ಎಲ್ಲರೂ ಒಂದಲ್ಲ ಒಂದು ದಿನ ಅಮೇರಿಕಾಗೆ ಹಾರಲು ಸಿದ್ಧರಾಗಿರುವಂತೆ ಕಾಣುತ್ತಾರೆ. ಅವರಿಗೆ ಇಲ್ಲಿನ ಎಲ್ಲಾ ಬೇರುಗಳನ್ನೂ ಕತ್ತರಿಸಿಕೊಂಡು ಹಾರಲು ಯಾವ ತೊಂದರೆಯೂ ಇಲ್ಲದ ಹಾಗೆ ಮಾಡಿಕೊಳ್ಳುವ ತವಕ. ಇಲ್ಲಿನ ಯಾವ ಸಂಗತಿಗಳೂ ತಮ್ಮನ್ನು ಬಾಧಿಸಿದ ಹಾಗೆ ಬದುಕು ರೂಪಿಸಿಕೊಳ್ಳುತ್ತಾರೆ. ಓದು ಮುಗಿಯುವ ಮೊದಲೇ ಅವರ ಆಕ್ಸಂಟ್ ಬದಲಾಗಿರುತ್ತದೆ. ಅವರ ಅಭಿರುಚಿ ರಿಪೇರಿಯಾಗಿರುತ್ತದೆ. ಸಂಪೂರ್ಣವಾಗಿ ರಫ್ತಿಗೆ ಸಿದ್ಧವಾಗಿ ಮೈಮೇಲೆ ಸ್ಟಿಕ್ಕರು ಅಂಟಿಸಿಕೊಂಡು ಡಬ್ಬಿಯಲ್ಲಿ ಕುಳಿತ ಹಣ್ಣಿನ ಹಾಗಾಗಿರುತ್ತಾರೆ. ಈ ಆರೋಪದಲ್ಲಿ ಸತ್ಯವಿಲ್ಲವೆಂದಲ್ಲ.

youth.png

ಗಮನಿಸಿ ನೋಡಿ, ತಮ್ಮ ಮೂಲದಿಂದ ಕಳಚಿಕೊಳ್ಳುವುದನ್ನೇ ಆಧುನಿಕತೆ ಎಂದು ಭಾವಿಸಿರುವ ಹುಡುಗರಿಗೆ ಐಡೆಂಟಿಟಿ ಇಲ್ಲದ ಹಾಗಾಗುತ್ತದೆ. ಯಾವ ಜಾಗಕ್ಕೆ ಹೋದರೂ ಪರದೇಶಿಯಂತೆ ಭಾಸವಾಗುತ್ತದೆ. ಯಾವುದೂ ನನ್ನದಲ್ಲ ಎಂಬ ನಿರ್ಲಿಪ್ತತೆ ಅವರನ್ನು ಕಾಡುತ್ತದೆ. ಹೀಗೆ ತಮ್ಮ ಜಾತಿ, ಹುಟ್ಟಿದ ಊರು, ರಕ್ತ ಸಂಬಂಧಿಗಳು, ತಮ್ಮ ಆಚಾರಗಳು, ಸಂಸ್ಕೃತಿ, ಹಬ್ಬಗಳು ಮುಂತಾದವುಗಳನ್ನೆಲ್ಲಾ ಬಿಡುತ್ತಾ ಅಧುನಿಕರಾಗುತ್ತಾ, ಅಮೇರಿಕಾಗೆ ರಫ್ತಾಗಲು ತಯಾರಾಗುತ್ತಾ ಈ ಹುಡುಗರಿಗೆ ವಿಪರೀತವಾದ ಅಭದ್ರತೆ ಕಾಡಲು ಶುರುವಾಗುತ್ತದೆ. ಸದಾ ಒಂದು ಕಾಲು ಹೊರಗೇ ಇಟ್ಟುಕೊಂಡು ಬದುಕು ದೂಡುತ್ತಿರುವವರಿಗೆ ತಮ್ಮದೆಂಬ ನೆಲೆಯೇ ಇಲ್ಲ ಎಂಬ ಅರಿವು ಮಾನಸಿಕ ಕಳವಳಕ್ಕೆ ಕಾರಣವಾಗುತ್ತದೆ. ಹೀಗಾಗಿ ಉನ್ನತ ಶಿಕ್ಷಣವನ್ನು ಪಡೆದುಕೊಂಡು, ಕೈತುಂಬ ಹಣ ತರುವ ಕೆಲಸಗಳನ್ನು ಪಡೆದ ಯುವಕರು, ಯುವತಿಯರು ಕೋಮುವಾದವನ್ನು ಅಪ್ಪಿಕೊಳ್ಳುತ್ತಾರೆ. ತಾನೊಬ್ಬ ಹಿಂದು ಎಂದುಕೊಳ್ಳುವುದೇ ಅವರಿಗೆ ನೆಮ್ಮದಿಯನ್ನೂ, ಭದ್ರತೆಯನ್ನೂ ಕೊಡುತ್ತದೆ. ಆತನಿಗೆ ಹಿಂದೂವಿಗಿರಬೇಕಾದ ಸಾಂಸ್ಕೃತಿಕ ಬೇರುಗಳ್ಯಾವೂ ಉಳಿದಿರದಿದ್ದರೂ ‘ಹಿಂದೂ’ ಎಂಬ ಐಡೆಂಟಿಟಿ ಬೇಕಿರುತ್ತದೆ. ಅವರಿಗೆ ತಾವು ಆಧುನಿಕತೆಯ ಭರದಲ್ಲಿ, ಪಾಶ್ಚಾತ್ಯ ಆಚಾರ ವಿಚಾರದ ಅನುಕರಣೆಯ ಹುಮ್ಮಸ್ಸಿನಲ್ಲಿ ಕತ್ತರಿಸಿಕೊಂಡ ಕರುಳ ಬಳ್ಳಿಗಳ ಬಗೆಗೂ ಪ್ರಾಮಾಣಿಕ ಕಾಳಜಿ ಬೆಳೆಯುವುದಿಲ್ಲ. ಕಡಿದ ತಂತುಗಳನ್ನು ನವೀಕರಿಸಿಕೊಳ್ಳಬೇಕೆಂಬ ಯಾವ ಹಂಬಲವೂ ಇರುವುದಿಲ್ಲ. ಅಸಲಿಗೆ ಕಳೆದುಕೊಂಡ ಸ್ವಂತಿಕೆಗಾಗಿ ಅವರು ಮರುಗುವುದೂ ಇಲ್ಲ. ಅವರಿಗೆ ಯಾವ ಅಟ್ಯಾಚ್ ಮೆಂಟುಗಳೂ ಬೇಡ ಆದರೆ ತಮ್ಮದೆಂದು ಭಾವಿಸಿಕೊಳ್ಳಲು ಒಂದು ಐಡೆಂಟಿಟಿಯ ಆಸರೆ ಬೇಕು. ಇದು ಕೇವಲ ಹಿಂದೂಗಳಲ್ಲಿ ನಡೆಯುತ್ತಿರುವ ಪ್ರಕ್ರಿಯೆಯಲ್ಲ, ಆಧುನಿಕತೆಯೊಂದಿಗೆ ಮುಖಾಮುಖಿಯಾಗುತ್ತಿರುವ ಎಲ್ಲಾ ಧರ್ಮಗಳೂ, ಸಮಾಜಗಳೂ, ಸಂಸ್ಕೃತಿಗಳೂ ಎದುರಿಸುತ್ತಿರುವ ಸಮಸ್ಯೆ.
ಬಹುಶಃ ಈ ಕಾರಣಕ್ಕಾಗಿಯೇ ಯುವಕರಿಗೆ ಕೋಮುವಾದ ಪ್ರಿಯವಾಗುತ್ತದೆಯೇನೊ. ತಾನು ಆಸರೆಗಾಗಿ ವಾಲಿಕೊಂಡ ಐಡೆಂಟಿಟಿಗೆ ಯಾವಾಗ ಧಕ್ಕೆಯಾಗುತ್ತದೋ, ಪೆಟ್ಟು ಬೀಳುತ್ತದೋ ಆಗೆಲ್ಲಾ ಆತ ಹೆಡೆಯೆತ್ತಿ ಕೆರಳಿ ನಿಲ್ಲುತ್ತಾನೆ. ರಾಮಾಯಣವನ್ನು ಓದಿಯೇ ಇರದಿದ್ದರೂ, ಶ್ರೀರಾಮನ ಪುರಾಣ, ಆದರ್ಶದೊಂದಿಗೆ ಕೊಟ್ಟು ತೆಗೆದುಕೊಳ್ಳಲು ಏನೂ ಇಲ್ಲದಿದ್ದರೂ ರಾಮ ಸೇತುವಿನ ವಿವಾದ ಅವನನ್ನು ರೊಚ್ಚಿಗೆಬ್ಬಿಸುತ್ತದೆ. ಬೀದಿಗಿಳಿಯುವಂತೆ ಮಾಡುತ್ತದೆ. ಎಂದೂ ಒಂದು ಕಲಾಕೃತಿಯನ್ನು ಕಲಾತ್ಮಕ ದೃಷ್ಟಿಯಿಂದ ನೋಡಿರದಿದ್ದರೂ, ಕಲೆಗೂ ಅವನಿಗೂ ಯಾವ ಹೊಂದಾಣಿಕೆಯೂ ಇಲ್ಲದಿದ್ದರೂ ಎಂ.ಎಫ್. ಹುಸೇನನ ನಗ್ನ ಚಿತ್ರಗಳು ಕಣ್ಣುರಿಯನ್ನು ಉಂಟುಮಾಡುತ್ತವೆ. ಆದರೆ ಇದೇ ಕೆಲಸವನ್ನು ಅನ್ಯ ಕೋಮಿನವರು ಮಾಡಿದಾಗ, ತಸ್ಲೀಮಾಳನ್ನು ಹೊರದಬ್ಬಿದಾಗ, ಡ್ಯಾನಿಶ್ ಚಿತ್ರಕಾರನ ಮೇಲೆ ಫತ್ವಾ ಹೊರಡಿಸಿದಾಗ, ಸಲ್ಮಾನ್ ರಶ್ದಿಯನ್ನು ಪೀಡಿಸಿದಾಗ ಇವರು ಅದನ್ನೆಲ್ಲಾ ಟೀಕಿಸಬಲ್ಲರು, ವಸ್ತುನಿಷ್ಠವಾಗಿ ಅವಲೋಕನ ಮಾಡಬಲ್ಲರು. ಆದರೆ ತಮ್ಮ ಐಡೆಂಟಿಟಿಗೆ ಗಾಯವಾದಾಗ ಮಾತ್ರ ಯಾವ ವಸ್ತುನಿಷ್ಠತೆಯೂ ಕಾಣುವುದಿಲ್ಲ. ಇದೂ ಎಲ್ಲಾ ಕೋಮುಗಳ ಈ ‘ಐಡೆಂಟಿಟಿ ಜೀವಿ’ಗಳ ಪರಿಸ್ಥಿತಿ.

ಇದೇ ಜಾಡಿನಲ್ಲಿ ಆಲೋಚಿಸಿ ಸಮಾಜವಾದಿ ಚಿಂತಕರಾದ ಡಿ.ಎಸ್.ನಾಗಭೂಷಣ್‌ರಿಗೆ ಒಂದು ಪತ್ರ ಬರೆದಿದ್ದೆ. ಅದರಲ್ಲಿ ನಮ್ಮಂಥ ಯುವಕರು ಈ ಸಮಸ್ಯೆಯಿಂದ ಪಾರಾಗಲು ಏನು ಮಾಡಬಹುದು ಎಂದು ಕೇಳಿದ್ದೆ. ಒಂದು ಸೈದ್ಧಾಂತಿಕ ನೆಲೆಯನ್ನು ರೂಪಿಸಿಕೊಂಡು, ಕೋಮಿನ ಐಡೆಂಟಿಯ ಬಂಧದಿಂದ ಮುಕ್ತರಾಗಲು ಸಹಾಯಕವಾಗುವ ಸಾಹಿತ್ಯವನ್ನು ಶಿಫಾರಸ್ಸು ಮಾಡುವಂತೆ ಕೇಳಿಕೊಂಡಿದ್ದೆ. ಯಾವುದೋ ಲಹರಿಯಲ್ಲಿ ಪತ್ರಿಸಿದ್ದ ನನ್ನ ಓಲೆಗೆ ಉತ್ತರ ಬರಬಹುದೆಂಬ ಖಾತರಿ ಇರಲಿಲ್ಲ, ನಿರೀಕ್ಷೆಯೂ ಹೆಚ್ಚಿರಲಿಲ್ಲ. ಆದರೆ ‘ವಿಕ್ರಾಂತ ಕರ್ನಾಟಕ’ ವಾರ ಪತ್ರಿಕೆಯ ತಮ್ಮ ಅಂಕಣದಲ್ಲಿ ನನ್ನ ಪತ್ರವನ್ನು ಉಲ್ಲೇಖಿಸಿ ಅದರಲ್ಲಿ ನಾನು ಎತ್ತಿದ್ದ ಪ್ರಶ್ನೆಗಳಿಗೆ ಉತ್ತರಿಸುವ ಪ್ರಯತ್ನಮಾಡಿದರು. ನನ್ನಂಥದ್ದೇ ಸನ್ನಿವೇಶಗಳಲ್ಲಿರುವ, ನನ್ನ ಸಮಸ್ಯೆಗಳನ್ನೇ ಹೊಂದಿರುವ ಯುವಕ-ಯುವತಿಯರಿಗೆ ನಾಗಭೂಷಣ್‌ರ ಮಾತುಗಳು ಸಹಾಯಕವಾಗಬಹುದು ಎಂದುಕೊಂಡು ಅವನ್ನು ಇಲ್ಲಿ ಕೊಡುತ್ತಿದ್ದೇನೆ:

“ಇತ್ತೀಚೆಗೆ ನನ್ನ ಇದೇ ಲೇಖನದ ಬಗ್ಗೆ ಕೆ.ಎಸ್.ಸುಪ್ರೀತ್ ಎಂಬ ಇಂಜಿನಿಯರಿಂಗ್ ವಿದ್ಯಾರ್ಥಿಯೊಬ್ಬರ ಪ್ರತಿಕ್ರಿಯೆಯೊಂದನ್ನು, ಇದಕ್ಕೆ ನಿಮ್ಮ ಪ್ರತಿಕ್ರಿಯೆ ಅಗತ್ಯ ಎಂಬರ್ಥದಲ್ಲಿ ನನಗೆ ರವಾನಿಸಿದ್ದಾರೆ. ಇವರು ನನ್ನ ಈ ಲೇಖನದಲ್ಲಿ ವ್ಯಕ್ತವಾಗಿರುವ ಆತಂಕಗಳ ಬಗ್ಗೆ ತಾತ್ವಿಕವಾಗಿ ಆಂತರಂಗಿಕ ಸಹಮತ ಹೊಂದಿರುವುದಾದರೂ, ಬಹಿರಂಗ ವಾತಾವರಣ ಅದಕ್ಕೆ ಪೂರಕವಾಗಿಲ್ಲದಿರುವುದರ ವಾಸ್ತವದ ಬಗ್ಗೆ ಬರೆದಿದ್ದಾರೆ. ತಾವು ಸಹ ಇಂತಹ ವಾತಾವರಣದ ಸಹಜ ಬಲಿಯಾಗಿದ್ದು, ಇದರಿಂದ ತಮ್ಮಂತಹವರು ಹೊರ ಬರಲು ಪೂರಕವಾಗುವಂತಹ ವಾತಾವರಣವನ್ನು ನಿರ್ಮಿಸಲು ಸೆಕ್ಯುಲರ್‌ವಾದಿಗಳು ಏಕೆ ಪ್ರಯತ್ನಿಸುತ್ತಿಲ್ಲ ಎಂದು ಪ್ರಶ್ನಿಸಿದ್ದಾರೆ. ಹಾಗೇ, ಈ ವಿಷಯದಲ್ಲಿ ಮಾರ್ಗದರ್ಶಕವಾಗುವಂತಹ ಸಾಹಿತ್ಯವನ್ನೂ ಸೂಚಿಸಿ ಎಂದು ಸುಪ್ರೀತ್ ಕೇಳಿದ್ದಾರೆ.

ಮೊದಲಿಗೆ, ನಾನೇನೂ ಇಂದಿನ ಸೆಕ್ಯುಲರ್ವಾದಿಗಳ ವಕ್ತಾರನಲ್ಲ ಎಂದು ಸ್ಪಷ್ಟಪಡಿಸ ಬಯಸುವೆ. ಈ ಸೆಕ್ಯಲರ್‌ವಾದವೆಂಬುದೇ ಅನುಮಾನಾಸ್ಪದತೆಗೆ ಈಡಾಗಿರುವ ಇಂದಿನ ರಾಜಕೀಯ ಸನ್ನಿವೇಶದಲ್ಲಿ ನಿಂತು, ಕೋಮುವಾದದ ವಿರುದ್ಧ ಮಾತನಾಡುವಾಗ ಅನೇಕ ತಪ್ಪು ಕಲ್ಪನೆಗಳುಂಟಾಗುವ ಸಂಭವವಿದೆ. ಏಕೆಂದರೆ, ಕೋಮುವಾದದ ವಿರುದ್ಧ ಏಕೈಕ ಅಸ್ತ್ರ ಸೆಕ್ಯುಲರ್‌ವಾದ ಎಂಬ ನಂಬಿಕೆಯನ್ನು ಸೃಷ್ಟಿಸಲಾಗಿದೆ. ಮೂಲತಃ ಭೌತವಾದಿ ರಾಜಕಾರಣದ ಪ್ರತಿಪಾದಕರಾದ ಕಟ್ಟಾ ಎಡಪಂಥೀಯರು ಸೃಷ್ಟಿಸಿರುವ ನಂಬಿಕೆಯಿದು. ಆದರೆ ಸೆಕ್ಯುಲರಿಸಂ ಎಂದರೇನೆಂದು ಈವರೆಗೆ ಈ ಯಾರೂ ಖಚಿತವಾಗಿ, ನಿರ್ದಿಷ್ಟವಾಗಿ ನಿರೂಪಿಸಿಲ್ಲ. ಅದಕ್ಕೆ ನಮ್ಮ ಯಾವುದೇ ಭಾರತೀಯ ಭಾಷೆಯಲ್ಲೂ ಸಮರ್ಪಕವಾದ ಸಮಾನ ಶಬ್ದವನ್ನು ಟಂಕಿಸಲಾಗಿಲ್ಲ. ಧರ್ಮ ನಿರಪೇಕ್ಷತೆ ಎಂಬ ಶಬ್ದದಿಂದ ಹಿಡಿದು ಇದಕ್ಕೆ ತದ್ವಿರುದ್ಧ ಅರ್ಥವಿರುವ ಸರ್ವಧರ್ಮ ಸಮಭಾವ ಎಂಬ ಶಬ್ದದವರೆಗೆ ಇದರರ್ಥವನ್ನು ಎಳೆದಾಡಲಾಗಿದೆ! ಇದಕ್ಕೆ ಕಾರಣ ಇದು ಆಧುನಿಕತೆಯ ಹಂಬಲದಲ್ಲಿ ನಮ್ಮ ಸಂವಿಧಾನ ನಿರ್ಮಾತೃಗಳು ಐರೋಪ್ಯ ರಾಜಕಾರಣದಿಂದ ಕಿತ್ತು ತಂದು ಇಲ್ಲಿ ನೆಡಲಾಗಿರುವ ಪರಿಕಲ್ಪನೆಯಾಗಿರುವುದೇ ಆಗಿದೆ…

…ಹಾಗೇ ಸುಪ್ರೀತ್ ಅವರಿಗೆ ಗಾಂಧಿ, ಅಂಬೇಡ್ಕರ್ ಹಾಗೂ ಲೋಹಿಯಾರನ್ನು ಮುಕ್ತ ಮನಸ್ಸಿನಿಂದ ಓದಿ ಎಂದು ಸೂಚಿಸಬಯಸುವೆ. ರಾಷ್ಟ್ರ ವಿಭಜನೆ ಸೃಷ್ಟಿಸಿದ್ದ ಕೋಮು ದಳ್ಳುರಿಯ ಮಧ್ಯೆಯೂ, ಪಾಕಿಸ್ತಾನಕ್ಕೆ ಕೊಡಬೇಕಾದ ನಿಧಿಯನ್ನು ಕೊಡುವಂತೆ ಸಾರ್ವಜನಿಕವಾಗಿ ಒತ್ತಾಯಿಸಿ ಹಿಂದೂ ಕೋಮುವಾದಿಯೊಬ್ಬನ ಗುಂಡಿಗೆ ಬಲಿಯಾದ ಸನಾತನ ಹಿಂದೂ ಎನ್ನಿಸಿಕೊಂಡಿದ್ದ ಗಾಂಧಿ; ತಾವು ರೂಪಿಸಿದ್ದ ಸಮಗ್ರ ಹಿಂದೂ ನಾಗರಿಕ ಸಂಹಿತೆ ಮಸೂದೆಯನ್ನು ಸಂಸತ್ತಿನಲ್ಲಿ ಮಂಡಿಸಲು ಅವಕಾಶ ಕೊಡದ ಸರ್ಕಾರದ ಮಂತ್ರಿ ಪದವಿಗೇ ರಾಜೀನಾಮೆ ನೀಡಿ ಹೊರಬಂದ ಆಧುನಿಕತಾವಾದಿ ಅಂಬೇಡ್ಕರ್ ಮತ್ತು ಸಾಮಾನ್ಯ ನಾಗರಿಕ ಸಂಹಿತೆಯ ಜಾರಿಯನ್ನು ತಮ್ಮ ಪಕ್ಷದ ಒಂದು ಚುನಾವಣಾ ವಿಷಯವನ್ನಾಗಿ ಮಾಡಿಕೊಂಡು ಪ್ರಚಾರ ಮಾಡಬಲ್ಲವರಾಗಿದ್ದ ರಾಜಕೀಯ ದುಸ್ಸಾಹಸಿ ಲೋಹಿಯಾ ಹೊಸ ರಾಷ್ಟ್ರಕ್ಕೆ ಹೊಸ ಧರ್ಮ ಸಂಹಿತೆಯೊಂದನ್ನು ರೂಪಿಸಿ ಸೆಕ್ಯುಲರಿಸಂಗೆ ಹೊಸ ಅರ್ಥ ಕೊಡಲೆತ್ನಿಸಿದವರು. ಇವರ ಜೊತೆಗೇ, ಈಚಿನ ಅಸ್ಘರಾಲಿ ಇಂಜಿನಿಯರರ ಪುಸ್ತಕ – ಲೇಖನಗಳನ್ನು ಓದಿದರೆ ಚೆನ್ನು. ಆಗ ಆರೋಗ್ಯಕರ ವರ್ತಮಾನವನ್ನು ಕಟ್ಟಲು ಚರಿತ್ರೆಯನ್ನು ಎಷ್ಟು ಎಚ್ಚರಿಕೆ ಮತ್ತು ವಿವೇಕಗಳಿಂದ ಅರ್ಥ ಮಾಡಿಕೊಂಡು ಬಳಸಿಕೊಳ್ಳಬೇಕಾಗುತ್ತದೆ ಎಂಬುದು ಗೊತ್ತಾಗುತ್ತದೆ.”

-ಸುಪ್ರೀತ್.ಕೆ.ಎಸ್

2 Responses to "ನಾನ್ರಿ ಎಡಿಟರ್: ಎಕ್ಸ್ ಜನರೇಶನ್ ಹಾಗೂ ಕೋಮುವಾದ"

ಪ್ರಿಯ ಗೆಳೆಯ ಸುಪ್ರೀತ್,

ಬಹಳ ಹಿಂದೆ ಸಂಪದದಲ್ಲಿ ಬೇಂದ್ರೆ ಕುರಿತು ನಾನು ಬರೆದ ಲೇಖನವೊಂದಕ್ಕೆ ನೀನು (ನನಗಿಂತ ವಯಸ್ಸಿನಲ್ಲಿ ಕಿರಿಯ ಎನ್ನುವ ಸಲಿಗೆಯಿಂದ) ಪ್ರತಿಕ್ರಿಯಿಸಿದ್ದೆ. ಆಗ ನೀನು ಹಾಗೂ ನಿನ್ನ ಗೆಳೆಯರು ಒಡಗೂಡಿ “ಕಲರವ” ಎನ್ನುವ ಒಂದು ಪತ್ರಿಕೆಯನ್ನು ನಡೆಸುತ್ತೀರಿ ಎಂದು ಓದಿದ್ದೆ. ಆದರೆ, ಅದನ್ನು ಸರಿಯಾಗಿ ನೋಡುವ ಪ್ರಯತ್ನ ಮಾಡಿರಲಿಲ್ಲ. ಇಂದು, ನಿಮ್ಮ “ಕಲರವ”ದಲ್ಲಿ ಪ್ರಕಟವಾಗಿರುವ “ಎಕ್ಸ್ ಜನರೇಶನ್ ಹಾಗೂ ಕೋಮುವಾದ” ಎನ್ನುವ ಲೇಖನ ಓದಿದೆ. ನಿಜಕ್ಕೂ ನಮ್ಮಂತಹ ಯುವಕರು ಯೋಚಿಸಬೇಕಾಗಿರುವುದು ಹೀಗೆಯೇ. ಇಂತಹ ಪ್ರಯತ್ನಗಳ ಮೂಲಕ ಜಾತಿ, ಮತ, ಧರ್ಮ, ಭ್ರಷ್ಟಾಚಾರ, ವರದಕ್ಷಿಣೆ, ಹಿಂಸಾಚಾರ ಮುಂತಾದ ಅನಿಷ್ಟಗಳಿಂದ ಮುಕ್ತವಾದ ಕೇವಲ “ಮಾನವ ಕೇಂದ್ರಿತ”ವಾದ ಒಂದು ಒಳ್ಳೆಯ ಸಮಾಜವನ್ನು ನಾವೆಲ್ಲ ನಿರ್ಮಾಣ ಮಾಡುವಂತಾದಲ್ಲಿ ಎಷ್ಟು ಚೆನ್ನ ಎಂದೆನಿಸುತ್ತೆ. ಈ ನಿಟ್ಟಿನಲ್ಲಿ ನನ್ನಿಂದ ಏನಾದರೂ ಸೇವೆಯಾಗಬೇಕಿದ್ದಲ್ಲಿ ನಿಸ್ಸಂಕೋಚವಾಗಿ ನನ್ನನ್ನು ಕೇಳಬಹುದು. ನನ್ನ ಕೈಲಾದ ಮಟ್ಟಿಗೆ ಏನಾದರೂ ಸೇವೆ ಮಾಡುವದಕ್ಕೆ ನಾನು ಸದಾ ಸಿದ್ಧ. ನಾನು ಕೂಡ ಡಿ.ಎಸ್.ಎನ್.ರಿಗೆ ಇಂತದ್ದೇ ಕೆಲವೊಂದು ವಿಚಾರವಾಗಿ ಪತ್ರ ಬರೆದಿದ್ದೇನೆ. ಆದರೆ, ಅವರು ಅದಕ್ಕೆ ಪ್ರತಿಕ್ರಿಯಿಸಿಲ್ಲ. “ವಿಕ್ರಾಂತ ಕರ್ನಾಟಕ”ದಲ್ಲಿ ಏನಾದರೂ ಈ ಕುರಿತು ಬರೆದಿದ್ದಾರೆಯೇ ನೋಡಬೇಕಷ್ಟೆ. ಆದರೂ, ನಮ್ಮ ಪ್ರಯತ್ನಗಳನ್ನು ನಾವು ಮುಂದುವರಿಸಲೇಬೇಕು. ನಿನ್ನ ಪ್ರಶ್ನೆಗಳಿಗೆ ಅವರು ಪ್ರತಿಕ್ರಿಯಿಸಿರುವುದು ನಿಜಕ್ಕೂ ಸಂತಸದ ಸಂಗತಿ.

ನಿನಗೆ ಎಲ್ಲವೂ ಒಳ್ಳೆಯದಾಗಲಿ,

ಪ್ರೀತಿಯಿಂದ,
ಶಶಿ

ಶಶಿ ಸರ್,
ನನ್ನನ್ನು ಗೆಳೆಯ ಎಂದು ಸಲಿಗೆಯಿಂದ ಕರೆದಿರುವುದಕ್ಕೆ ನಾನು ನಿಜಕ್ಕೂ ಆಭಾರಿ.
ನಿಮ್ಮ ನಲುಮೆಗೆ-ಒಲುಮೆಗೆ ನಾನು ಮೂಕನಾಗಿರುವೆ. ಆವಶ್ಯಕವಾಗಿ ಮಾರ್ಗದರ್ಶನ, ನೆರವಿನ ಅಗತ್ಯವಿದ್ದಾಗ ನಿಮ್ಮನ್ನು ಸಂಪರ್ಕಿಸುವೆ.

ಸುಪ್ರೀತ್

ನಿಮ್ಮದೊಂದು ಉತ್ತರ

Fill in your details below or click an icon to log in:

WordPress.com Logo

You are commenting using your WordPress.com account. Log Out /  ಬದಲಿಸಿ )

Google photo

You are commenting using your Google account. Log Out /  ಬದಲಿಸಿ )

Twitter picture

You are commenting using your Twitter account. Log Out /  ಬದಲಿಸಿ )

Facebook photo

You are commenting using your Facebook account. Log Out /  ಬದಲಿಸಿ )

Connecting to %s

Blog Stats

  • 68,988 hits
ಜುಲೈ 2008
ಸೋಮ ಮಂಗಳ ಬುಧ ಗುರು ‍ಶು ಶನಿ ಭಾನು
 123456
78910111213
14151617181920
21222324252627
28293031  

Top Clicks

  • ಯಾವುದೂ ಇಲ್ಲ
%d bloggers like this: